![](https://eacnews.asia/uploads/images/4939.jpg)
អាវុធហត្ថខេត្តបាត់ដំបងបញ្ជូនមន្ត្រីអង្គភាពប្រឆាំងអំពើពុករលួយម្នាក់ទៅតុលាការក្រោយផ្ទុះអាវុធជាច្រើនគ្រាប់
បាត់ដំបង៖ សមត្ថកិច្ចបានកសាងសំណុំរឿងបញ្ជូនបុរសជាមន្ត្រីក្នុងអង្គភាពប្រឆាំងអំពើពុករលួយ (ACU ) ម្នាក់ទៅតុលាការក្រោយផ្ទុះអាវុធជាច្រើនគ្រាប់នៅក្នុងពិធីខួបកំណើតមួយ។
មន្ត្រីការិយាល័យព្រហ្មទណ្ឌទីបញ្ជាការកងរាជអាវុធហត្ថខេត្តបាត់ដំបងបានបញ្ជាក់ថា ជនសង្ស័យឈ្មោះ ឆាយ សេរីបុត្រ អាយុ ៣០ឆ្នាំ ជាមន្ត្រីអង្គភាពប្រឆាំងអំពើពុករលួយ ត្រូវបានកម្លាំងជំនាញរៀបចំសំណុំរឿងបញ្ជូនទៅកាន់សាលាដំបូងខេត្តបាត់ដំបងហើយកាលពីព្រឹកថ្ងៃទី២៥ ខែតុលា ឆ្នាំ២០២១ម្សិលមិញ។
យោងតាមប្រភពពីកន្លែងកើតហេតុបានឲ្យដឹងថា កាលពីយប់ថ្ងៃទី២៤ ខែតុលា ឆ្នាំ២០២១ ត្រង់ចំណុចឃុំបឹងរាំង ស្រុកកំរៀង ខេត្តបាត់ដំបង ជនដៃដល់ឈ្មោះ ឆាយ សេរីបុត្រ បានចូលរួមក្នុងពិធីខួបកំណើតមួយជាមួយជនរងគ្រោះឈ្មោះ រ៉ុម ចន្ថា ដែលជាមន្ត្រីយោធា។ ក្នុងពេលជួបជុំអ្នកទាំងពីរបានឈ្លោះប្រកែកគ្នារហូតលោក ឆាយ សេរីបុត្រ ឈានដល់ការប្រើប្រាស់អំពើហិង្សា និងផ្ទុះអាវុធជាច្រើនគ្រាប់បាញ់លើជនរងគ្រោះធ្លាយស្មាខាងស្ដាំតែម្ដង។
ប្រភពដដែលបានបញ្ជាក់ថា ក្រោយហេតុការណ៍បានកើតឡើងកម្លាំងអាវុធហត្ថស្រុកកំរៀង បានចុះទៅសាកសួរភ្លាមៗនឹងបាននាំខ្លួនបុរសជនបង្កបញ្ជូនទៅកាន់មូលដ្ឋានកងរាជអាវុធហត្ថស្រុកទាំងយប់ដើម្បីសួរនាំបន្ថែម ហើយរហូតដល់ថ្ងៃទី២៥ ខែតុលា ក៏ត្រូវបានបញ្ជូនទៅតុលាការដើម្បីបន្តនីតិវិធីផងដែរ៕